CITB yn lansio Cynllun Strategol 2025–29

Mae Bwrdd Hyfforddi’r Diwydiant Adeiladu (CITB) wedi lansio ei Gynllun Strategol 2025-29 heddiw, sy’n amlinellu ei ddull o gefnogi anghenion sgiliau a hyfforddiant y diwydiant adeiladu dros y pedair blynedd nesaf.

Mae’r Cynllun hwn yn pwysleisio pwysigrwydd cydweithio â diwydiant a Llywodraethau’r DU, buddsoddi mewn datblygu sgiliau a hyfforddiant, a’r angen i fynd i’r afael â’r bwlch sgiliau er mwyn sicrhau y gall y diwydiant adeiladu fodloni gofynion y dyfodol.

Pwrpas trosfwaol y Cynllun hwn yw cefnogi’r diwydiant adeiladu i ddatblygu gweithlu medrus, cymwys a chynhwysol, gyda’r bwriad o wella cynhyrchiant a chael gwared ar y bwlch sgiliau.

Amcanion allweddol y Cynllun hwn yw:

1. Ysbrydoli a galluogi pobl amrywiol a medrus i fyd adeiladu trwy gynyddu nifer y newydd-ddyfodiaid i'r diwydiant trwy amrywiol lwybrau. Er mwyn cyflawni hyn, bydd CITB yn hyrwyddo gyrfaoedd adeiladu i dros 5 miliwn o newydd-ddyfodiaid posibl ac yn datblygu deunyddiau ac ymgyrchoedd newydd i arddangos adeiladu fel opsiwn gyrfa cyffrous.
2. Datblygu system sgiliau a hyfforddiant i ddiwallu anghenion y presennol a'r dyfodol drwy ei symleiddio a'i gwneud yn fwy ymatebol. Yn ogystal, nod CITB yw cynyddu gallu a chapasiti mewn darpariaeth hyfforddiant adeiladu a datblygu llwybrau amgen i gymhwysedd a sicrhau bod hyfforddiant o ansawdd uchel ar gael.
3. Cefnogi'r diwydiant i hyfforddi, datblygu a chadw ei weithlu drwy arwain y gwaith o ddatblygu diffiniad o gymhwysedd y cytunwyd arno gan y diwydiant ar gyfer pob galwedigaeth adeiladu. Bydd CITB yn cynnig opsiynau hyblyg wedi’u hariannu i gyflogwyr uwchsgilio eu gweithlu a gwella cynhyrchiant trwy arferion gwell mewn rheoli ansawdd, rheoli prosiectau, arweinyddiaeth, a sgiliau digidol.

Bydd yr amcanion hyn yn cefnogi uchelgeisiau Llywodraeth y DU i ddarparu 1.5 miliwn o gartrefi newydd yn Lloegr, dwsinau o brosiectau seilwaith newydd, a thwf economaidd. Mae lles y diwydiant adeiladu yn aml yn arweinydd i’r economi ehangach, felly mae cael diwydiant iach gyda llif cryf o newydd-ddyfodiaid yn allweddol i gefnogi cynlluniau’r llywodraeth.

I gefnogi’r amcanion hyn, bydd CITB yn adolygu cymhellion grant a chyllid i gyflogwyr i wneud recriwtio’n fwy deniadol yn fasnachol wrth fuddsoddi mwy o adnoddau i fynd i’r afael â’r her o recriwtio a hyfforddi newydd-ddyfodiaid, gan ddarparu cymorth drwy ei Dîm Cymorth i Newydd-ddyfodiaid. Yn ogystal, bydd CITB yn cynyddu gallu a chapasiti mewn darpariaeth hyfforddiant adeiladu i wella cyfraddau cadw a chyflawniad ar gyfer dysgwyr y diwydiant ac ar hyn o bryd mae’n arwain y gwaith o ddatblygu diffiniad cymhwysedd y cytunwyd arno gan y diwydiant ar gyfer pob galwedigaeth adeiladu, ochr yn ochr â’r Cyngor Arweinyddiaeth Adeiladu.

Ers ei Gynllun Strategol diwethaf 2021-25, yn dilyn treial llwyddiannus, mae CITB hefyd wedi cyflwyno ei fenter Rhwydweithiau Cyflogwyr yn llawn, gan roi llais i gyflogwyr mewn penderfyniadau ariannu a mynd i’r afael ag anghenion sgiliau nawr ac yn y dyfodol.

Er mwyn cyflawni’r amcanion hyn, mae CITB yn dyrannu buddsoddiad sylweddol dros oes y Cynllun Strategol hwn i’r meysydd allweddol a ganlyn i gyd-fynd â blaenoriaethau cyflogwyr adeiladu:

• £554 miliwn i ysbrydoli a galluogi pobl amrywiol a medrus i fyd adeiladu.
• £315 miliwn i gefnogi'r diwydiant i hyfforddi, datblygu a chadw ei weithlu.
• £137 miliwn i ddatblygu system sgiliau a hyfforddiant i ddiwallu anghenion y presennol a'r dyfodol.
• £143 miliwn i redeg y busnes, gan gynnwys gweinyddu grantiau a lefi.

Y mesurau allweddol i asesu llwyddiant y Cynllun Strategol hwn yw:

• Cefnogi dros 15,000 o newydd-ddyfodiaid i gyflogaeth trwy lwybrau ychwanegol.
• Sicrhau cynnydd o 5% yn hyder cyflogwyr ynghylch argaeledd ac ansawdd hyfforddiant.
• Darparu cymorth i dros 35,000 o gyflogwyr gyda hyfforddiant uwchsgilio ac ymgysylltu â thros 5,000 o gyflogwyr newydd mewn hyfforddiant.

Dywedodd Tim Balcon, Prif Swyddog Gweithredol CITB: “Mae popeth rydyn ni’n ei wneud yn CITB yn ymwneud â diwallu anghenion sgiliau a hyfforddiant y diwydiant, ac mae’r Cynllun Strategol hwn yn darparu’r fframwaith rydyn ni’n bwriadu ei ddefnyddio i gyflawni hyn dros y pedair blynedd nesaf. Ers ein Cynllun Strategol diwethaf 2021-25, rydym wedi cefnogi dros 78,000 o brentisiaid, drwy ddarparu dros £188 miliwn mewn grantiau prentisiaeth. Rydym hefyd wedi darparu dros £37 miliwn o gyllid i gefnogi cyflogwyr micro a busnesau bach a chanolig, anadl einioes ein diwydiant.

“Rydym wedi ymgynghori â dros 1,000 o gyflogwyr i ddatblygu ein Cynllun Strategol 2025–29. Mae’n hanfodol bod cyflogwyr sydd wedi cofrestru gyda’r Lefi’n gallu gweld y Cynllun hwn cyn y Consensws – disgwylir i’r cyfraddau Lefi arfaethedig gynhyrchu incwm o tua £239 miliwn y flwyddyn dros y cyfnod 2026–29. Wedi'i ategu gan ein ffrydiau refeniw masnachol, caiff ei ddefnyddio i barhau i gefnogi cyflogwyr adeiladu gyda'u hanghenion sgiliau a hyfforddiant.

“Rydym yn edrych ymlaen at weithio gyda diwydiant, darparwyr hyfforddiant, a llywodraethau cenedlaethol i fynd i’r afael â’u heriau sgiliau a hyfforddiant a sicrhau bod y system sgiliau a hyfforddiant yn syml ac yn hygyrch i bawb.”

Darllenwch y Cynllun Strategol.